पुणे: इन्स्टिट्यूट ऑफ कंपनी सेक्रेटरीज ऑफ इंडिया (आयसीएसआय) ने १९ जानेवारी २०२६ पासून लागू होणाऱ्या २०२६ या वर्षासाठी सीएस पवन जी चांडक यांची अध्यक्षपदी, तर सीएस द्वारकानाथ चेनूर यांची उपाध्यक्षपदी निवड जाहीर केली आहे.
कॉर्पोरेट आणि संबंधित कायद्यांमध्ये दोन दशकांहून अधिक अनुभव असलेले सीएस पवन जी चांडक यांनी यापूर्वी २०२५ मध्ये आयसीएसआयचे उपाध्यक्ष म्हणून काम पाहिले आहे. तसेच त्यांनी प्रादेशिक व शाखा स्तरावर विविध नेतृत्वाची जबाबदारी यशस्वीपणे पार पाडली आहे.
आयसीएसआयचे फेलो सदस्य आणि दिवाळखोरी व्यावसायिक असलेले सीएस द्वारकानाथ चेनूर यांना कॉर्पोरेट कायदे व दिवाळखोरी क्षेत्रातील व्यापक अनुभव आहे. त्यांनी राष्ट्रीय व प्रादेशिक स्तरावर संस्थेतील अनेक महत्त्वाच्या नेतृत्व आणि समिती पदांवर कार्य केले आहे.
नवीन नेतृत्वाखाली आयसीएसआय सुशासन, सदस्य व भागधारकांच्या व्यावसायिक क्षमता-विकासावर तसेच जागतिक विस्तारावर विशेष भर देणार आहे. परदेशी केंद्रे आणि आंतरराष्ट्रीय सहकार्याच्या माध्यमातून आयसीएसआय आपला जागतिक ठसा अधिक मजबूत करत असून, नावीन्य, शाश्वतता, समावेशक विकास आणि प्रशासकीय उत्कृष्टतेवर केंद्रित राष्ट्रीय व आंतरराष्ट्रीय कार्यक्रमांचे आयोजन केले जात आहे.
आंतरराष्ट्रीय प्रशासन व्यावसायिकांसाठी जागतिक क्षमता-विकास कार्यक्रम राबविण्यासाठी आयसीएसआयने भारतीय तांत्रिक व आर्थिक सहकार्य (ITE C) चौकटीअंतर्गत परराष्ट्र व्यवहार मंत्रालयाशी सहकार्य केले आहे. या उपक्रमांतर्गत कॉर्पोरेट प्रशासन, ईएसजी, शाश्वतता, जोखीम व्यवस्थापन तसेच भारतातील डिजिटल प्रशासन सुधारणा यांवर विशेष लक्ष केंद्रित केले जाणार आहे.
दरम्यान, जून २०२६ सत्रापासून लागू होणाऱ्या कंपनी सेक्रेटरी एक्झिक्युटिव्ह एंट्रन्स टेस्ट (CSEET) मध्येही महत्त्वपूर्ण सुधारणा करण्यात आल्या आहेत. ही परीक्षा आता वर्षातून तीन वेळा — फेब्रुवारी, जून आणि ऑक्टोबर — ऑफलाइन पद्धतीने घेतली जाणार आहे. या सुधारणांमुळे संकल्पनात्मक स्पष्टता, विश्लेषणात्मक क्षमता, संवाद कौशल्ये आणि व्यावहारिक समज यांचा अधिक प्रभावी विकास होणार आहे.
याशिवाय, विशेष प्रमाणपत्र अभ्यासक्रम, सागरी नियमन व अनुपालन व्यवस्थापनातील पूर्णवेळ एमबीए, तसेच क्षमता-विकास वेबिनार मालिकांसह अनेक नवीन शैक्षणिक व व्यावसायिक उपक्रम सुरू करण्यात आले आहेत. सदस्य व विद्यार्थ्यांसाठी थेट प्रवेश मार्ग, ऑनलाइन शंका-निवारण वर्ग सुरू करण्यात आले असून ‘स्टुअर्डशिपवरील आयसीएसआय मार्गदर्शक तत्त्वे’, ‘हवामान बदल प्रशासन तत्त्वे’, ‘ईएसजी भागधारक सहभाग टूलकिट’ आणि ‘कार्यस्थळी लैंगिक छळ प्रतिबंध (PoSH) प्रशासकीय मानके’ यांसारखी महत्त्वाची मार्गदर्शक साधनेही सादर करण्यात आली आहेत.
नियामक मान्यता, शैक्षणिक सहकार्य तसेच सशस्त्र दलातील कर्मचारी, दुर्गम भागातील विद्यार्थी आणि आर्थिकदृष्ट्या दुर्बल घटकांतील विद्यार्थ्यांसाठी शुल्क सवलत व माफीसारख्या सामाजिक उपक्रमांद्वारे, आयसीएसआय मजबूत प्रशासन व व्यावसायिक उत्कृष्टतेच्या माध्यमातून राष्ट्रनिर्माणासाठी आपली बांधिलकी अधोरेखित करत आहे.